Plantun de Prouvènço

Pèr coumpara dos planto d'encò nostre

Atriplex tornabenei & Ononis spinosa subsp. antiquorum

Atriplex tornabenei

Amaranthaceae Chenopodiaceae

Nom en français : Arroche de Tornabene.

Descripcioun :
Aquest armòu trachis dins la sablo un pau grosso e li ribo clauvissouso de la mar. Es uno planto pulèu rebaladisso cuberto d'escaumo blanquinouso. Li fueio soun chanjadisso, mai li mai grosso soun proun larjo emé tres "sinus" (fotò). Lis espigo soun simplo. Mai, coume tóuti lis armòu, se recounèis subretout emé si valvo que soun eici lisco e en triangle.

Usanço :
Avèn ges d'entresigne, mai sèmblo que tóuti lis armòu soun bon à manja.

Port : Erbo
Taio : 20 à 60 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Atriplex
Famiho : Amaranthaceae
Famiho classico : Chenopodiaceae

Coulour de la flour : Jauno
Petalo : ges
Ø (o loungour) enflourejado : 3 à 6 cm
Flourido : Estiéu

Sòu : Ca
Autour basso e auto : Pancaro entresigna
Aparado : Noun
Juilet à setèmbre

Liò : Mar - Sablo - Ribo clauvissouso
Estànci : Termoumediterran à Mesoumediterran
Couroulougi : Eurimediterrano
Ref. sc. : Atriplex tornabenei Tineo, 1844

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.